საქართველოს პრემიერ-მინისტრი გიორგი კვირიკაშვილი 14 ნოემბერს „გლობალური მეწარმეობის კვირეულს" გახსნის.

ღონისძიებას ასევე დაესწრებიან საქართველოს პირველი ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი და ამერიკის შეერთებული შტატების ელჩი საქართველოში იან კელი. კვირეულში მონაწილეობას მიიღებენ ქართული სტარტაპები, სხვა კერძო კომპანიებისა და საჯარო სექტორის წარმომადგენლები. 

ორგანიზატორთა განცხადებით, ღონისძიებაზე მიწვეული სტუმრებo მოისმენენ სტარტაპთა წარმატების ისტორიებს და სირთულეებს, გაეცნობიან მათ მიერ გადალახულ პრობლემებსა და ხელშემწყობ ფაქტორებს. რეგლამენტის თანახმად, ღონისძიების მეორე ნაწილი პანელურ დისკუსიას დაეთმობა, რომლის თემა სახალხო დაფინანსება (Crowd Funding) იქნება. 

„გლობალური მეწარმეობის კვირეული" მსოფლიოს ყველა ქვეყანაში იმართება. საქართველოში ის წელს 14 ნოემბრიდან ერთი კვირის განმავლობაში ამერიკის შეერთებული შტატების საელჩოს, USAID-ის პროექტის „მმართველობა განვითარებისათვის" (G4G), საქართველოს ინოვაციებისა და ტექნოლოგიების სააგენტოსა (GITA) და მეწარმეთა ასოციაციის ხელშეწყობით გაიმართება.